أسئلة شائعة

هاخد وقت قد إيه عشان اقدر اتكلم إنجليزي بطلاقة؟

عشان توصل لمرحلة الاستقلال اللغوي، فانت محتاج مستواك يكون فوق المتوسط (B2)، ودا محتاج حوالي 500-600 ساعة دراسة موجهة في كورس مع مدرس لو انت هتبدأ من الصفر وزيهم دراسة وتدريب ذاتي.

إزاي اعرف إن مستوايا بيتطور؟

في أكثر من طريقة، لكن أسهل حاجة ممكن تعملها هي إنك تسجل نفسك وانت بتتكلم انجليزي مرة كل شهرين أو ثلاثة وتسمع التسجيلات وراء بعض عشان تلاحظ الفرق. ممكن برضه تحل امتحانات وتدريبات قديمة وقارن اجاباتك الجديدة بالقديمة.

محتاج اذاكر واتدرب مع نفسي كام ساعة؟

قصاد كل ساعة بتقضيها في الكورس ذاكر واتدرب مع نفسك ساعة في البيت. يعني لو بتحضر كورس 4 ساعات في الأسبوع، فانت محتاج تذاكر وتتدرب مع نفسك 4 زيهم في البيت بس ميكونوش وراء بعض. ومتنساش ان الأهم من الكم هو الاستمرارية.

إزاي أعدي مرحلة الركود اللي بتحصل لما مستوايا بيكون B1؟

عشان تتجاوز المرحلة دي، فانت محتاج تفهم انك بتحس بالركود قرب نهاية مرحلة B1 لأن سرعة التقدم الملحوظ في المستوى بتدأ تقل كل ما تقرب لهدفك زي ما بيحصل للي بينزل الجيم وبعد ما يعدي أول كام شهر السرعة اللي عضلاته بتكبر بيها بتقل.

عشان تحل المشكلة دي، اتحدى نفسك وابدأ اقرأ واسمع حاجات موجهة للأجانب نفسهم ويكون مستوى اللغة فيها عالي عشان تدي نفسك حافز انك تكمل وعشان برضه تتعلم كام حاجة جديدة.

هل الأفضل اتعلم مع مدرس أو أكاديمية ولا أتعلم لوحدي؟

لو انت مستواك أقل من مرحلة الاستقلال اللغوي واللي بتكون مستوى فوق المتوسط (B2) فالأفضل ليك انك تاخد كورس مع مدرس أو أكاديمية بجنب الدراسة والتدريب الذاتي.

لو مستواك B2 أو أعلى فانت ممكن تطور مستواك لوحدك بدون مدرس أو أكاديمية لكن دا هياخد وقت أطول شوية.

إزاي أبطل أترجم كل حاجة من الإنجليزي للغتي الأم والعكس؟

حاول تبطل تترجم كل كلمة تسمعها لوحدها، وركز انك تحاول تفهم الجمل والعبارات كاملة على بعضها. ولما مستواك يبدأ يعلى شوية، حاول تفكر بالإنجليزي في الحاجات اللي انت متمكن منها.

إزاي أبطل استخدم نفس الكلمات طول الوقت؟

اقرأ واسمع كتير وسجل الكلمات الجديدة وسط الجمل اللي سمعتهم أو قريتهم فيها، وركز على انك تتعلم المترادفات والمتلازمات اللفظية (الكلمات اللي بتيجي مع بعض بشكل طبيعي عشان تدي معنى معين).

إزاي أتدرب على المحادثة ومفيش أجانب حواليا؟

جرب تتكلم مع نفسك قدام المرآة أو سجل جزء من المحادثة على الموبايل وخلي الموبايل يبقى المتحدث الثاني. جرب برضه تستخدم تطبيقات محادثة مع أجانب من أنحاء العالم وتكون مخصصة لهدف تعليمي زي HelloTalk.

إزاي اتغلب على الخوف من إني أغلط وانا بتكلم؟

لازم تتقبل فكرة إن الأخطاء جزء طبيعي من عملية التعلم وإنك لازم تغلط عشان تتعلم الصح والأهم هو إنك تركز إنك توصل الفكرة اللي في دماغك للشخص اللي بتكلمه أكتر من إنك تكون بتركز على استخدام القواعد بدون أخطاء، وبالتدريج هتلاقي الخوف دا بدأ يقل والأخطاء كمان هتقل معاه.

أعمل إيه لو نسيت كلمة في وسط الجملة؟

أهم حاجة تعملها هي إنك متتوترش. لو نسيت كلمة ومش قادر تفتكرها، جرب تستخدم كلمة بديلة ليها نفس المعنى أو معنى قريب ليها. ممكن برضه تجرب توصف الكلمة اللي انت نسيتها. اوصف الشكل، الحجم، اللون، الاستخدام، وهكذا.

أرتب أفكاري إزاي بحيث أتكلم أسرع؟

بدل ما تحفظ كلمات لوحدها، درب نفسك على استخدام تعابير كاملة زي ...I'd like to أو ...Why don't we. دا هيوفر عليك وقت ومجهود لأنك مش هتضطر تبني جمل من الصفر.

ليه بفهم الإنجليزي المكتوب بسهولة، بس مش بقدر أفهم الأجانب وهم بيتكلموا؟

الأجانب بيعملوا حاجات وهم بيتكلموا زي ربط أصوات ببعضها، وتغيير أصوات بعض الحروف، وحذف بعض الأصوات ضمن حاجات تانية كتير. انت محتاج تتعلم الحاجات دي ومحتاج تسمع كتير عشان تقدر تتعود على طريقة كلامهم وتميز هم بيقولوا إيه، والأهم من دا الصبر لأن الحوار دا بيحتاج وقت ومجهود.

إزاي أحسن نطقي واتكلم بلهجة واضحة؟

ركز على نبرة صوتك وإيقاعه وامتى تعلي صوتك وامتى توطيه واتأكد من انك بتنطق الصوت الصح للحروف على حسب مكانهم في الكلمة. متركزس على انك تتعلم لهجة معينة. ركز انك تتعلم تنطق صح وبوضوح لأن اللهجة مش بنفس الأهمية زي النطق الواضح، خصوصا إنك اكتساب لهجة بيكون شبه مستحيل بعد الوصول لمرحلة البلوغ لأن مخارج الحروف بتكون ثبتت على وضع معين بيكون صعب جدا انه يتغير.

هل أنا محتاج كراسة أسجل فيها الكلمات الجديدة؟

أه، خصوصا لو انت لسه في بداية رحلتك لتعلم الإنجليزي. بس لما تسجل كلمة، سجلها بالجملة اللي انت اتعلمت الكلمة فيها. دا هيساعدك تستوعب معنى الكلمة واستخدامها بشكل أفضل وهيخلي عندك تراكيب كاملة تقدر تستخدمها بدون ما تقعد وقت تترجم اللي بيتقالك أو اللي هتقوله.

ليه ساعات نطق بعض الكلمات بيكون مختلف عن كتابتها؟

السبب وراء دا هو إن الإنجليزي كلغة بيكون فيها كلمات كتير مستعارة من لغات تانية كتير على مدار قرون وأغلب الكلمات دي كتابتها مش بتتغير فبالتالي تلاقي كلمات نطقها غير كتابتها.